ليه القتل وليه التـــــــــار؟ تعالوا نعيش الدنيا عمار
تعالوا نسامح بعض ونصفح نلاقى الحب طرح أشجار
بلاش نخلى حياتنا عــذاب هروب وتربص ليل ونهار
لمَّا بإيدك تاخد حقــــــــــك تصبح غابه وتبقى دمـار
لمَّا بتقتل نفس بريئــــــــه غضب المولى عليك والنار
معانا قانون يدينا حقوقــنا ميزان العدل دا لينا شعار
تيتم طفل برىء إيه ذنبه؟ وتقتل حلمه فى عز خضار
جبن وغدر كمان وخيــانه لمَّا تهاجم ناس أبــــــرار
تقتل تدبح تفســـــد أرض تخطيط لجريمه فيها اصرار
قسوة قلب بشكل غريب لو قلنا صخور نظلم أحجار
دايرة حرب أديها مفتوحه نفس الخطأ يجيب تكرار
لمَّا الدم الطاهر يسيــــــــل طعم الدنيا هيبقى مــرار
هتعيش محروم من كل أمان هتعيش متهدد قط وفــار
وكل أمالك راح تتحطـــــم وحابس ابنك بين أسوار
حل مشاكلك قبل ماتكــــبر شوف أسبابها وطفى شرار
بنشكر أيوا جهود الشرطه بس الكل عليـــــه أدوار
إعلام تعليم ورفع الــوعى تحسين دخل كمان أفكار
لسَّا صعيدنا حقيقى محروم محتاج نظره ياناس ياكبار
بتجيب سلاح بقوت أولادك وتزرع حقد ف قلب صغار
بتقتل أحسن ورده فى أسره وتقول العيله غسلت عـار
ليك السجن أديه مســتنى وابنك سابك هرب وطـــار
بيتك بجهلك كله ادمَّــــــر خراب وغراب عشعش فى الدار
سيبوا عادات الجهل تموت ضميرنا ودينا وليه نحتار
دا التار عمره ما حل مشاكل ندم ودموع وبيت انــهار
الجمعة أبريل 03, 2015 3:10 pm من طرف nemoCat
اليومية
