كتالوج الفرحة

لوهب طوفان أحزانك
اهرب على جبل التسابيح
اذكر ربك
حزنك زى التلج يسيح
يتبخر ويا الريح
ذكر المولى يداوى جريح
طوق نجاة ف كل زمانك
مهما مجدافك خانك
يعبر بيك لبر فسيح
لوهب طوفان أحزانك
وزاد الموج
مش لاقى سفينة ولا فوج
والبوصله ضاعت والكتالوج
وبحر همومك كله ضلام
والفكر بياخدك ويوديك
والحوت والقرش بينهش فيك
وبتصرخ مش لاقى كلام
من كتر الآه وكتر ألام
تاهت كل خرايط لدليلك
مش لاقى أى إغاثه تجيلك
اذكر ربك زيد تهليلك
مركب إنقاذ هتشيلك
بالحمد هتعبر بر أمانك
لوهب طوفان أحزانك
مش لاقى هروب
تاهت منك كل دروب
وفرصة أملك جاها غروب
استغفر.. توب
ابعد عن كل ذنوب
البس تقوى بأحسن توب
بذكر المولى ترق قلوب
ذكر المولى دا أقوى مفجر
مهما حزنك كان متحجر
زى الملح بسرعه يدوب
وصبرك
نور ورحمه يا سيدى ف قبرك
والصدقه حقيقى هتملا ميزانك
لو هبت نار أحزانك
زى الجمر يقيد جواك
دوس على كل الأشواك
وابكى على ذنب هواك
واملا كفوفك
من نهر دموع الخشيه
النازل من خوفك
طفـِّى نار الأحزان
بنور الإيمان
وعطر الخير الفايح من جوفك
نوِّر شمعه بذكر الله
رغم ضلام أحزانك
والغم المتربع على صدرك
والهم الجاثم على روحك
أكيد الفرحه رايحه تشوفك
ذكر المولى وضوء وأذانك
بلسم صافى يداوى جروحك
عبير بيفيح
لوهب طوفان أحزانك
اهرب على جبل التسابيح
ذكر المولى السرالكامن
والحضن الآمن
والنبع الأزلى لكل التفاريح

تسلم ايدك يارب
كالعادة موضوع رائع ياحنان

سلمت الأيادى على النقل الرائع

جميل يا حنان تسلم ايدك

الله عليكى ياحنان

موضوع جميل كالعادة