اكتب يا قلم
وامشى فوق السطور
وانشر بحبرك عبير ويّا العطور
وامشى فوق الخطوط والحد
وأسقى بحبرك فروع تتمدْ
تكبر وتبقى جذور
تخلى العزيمة والهمة تتشدْ
كلامك يصحى الحجر
يعلم شجر
كِيف يضلل ع السراية
تبقى فى الحر ضِـلَّة
وفى الشتاء سهراية
تحتها نستريح
من الهوا والريح
لمَّا حيلنا يتعب ويتهدْ
***
اكتب يا قلم
إياك تخاف من الموت
دا أنت للمظلوم اللسان والصوت
بيصرخ بيك لمَّا يعانى
أوعى تسكت تبقى أنانى
تقتل جوانا الأمانى
وصوت الأغانى انكتم وانسدْ
****
اكتب يا قلم
ولاَّ حبرك شف
ولاَّعندك بحر الكلام جف
دا أنا بنادى من سنين
واليأس علمنا الأنين
وأنت صوتك عالى
تقدر تسمِّع فى العلالى
وتوَصِّل لآخر مدى
دا أنا ما بسمع لصوتى غير الصدى
عاشق ودايب فى الحنين
بينده على حبيبته
وعمره ما جاله ردْ
***
اكتب
ولاَّ حزنك ما لوهش دوا يتوصف
ولاَّخايف تنقصف
وشمسك تنكسف
ونجمك ينخسف
والكلام ينحسب عليك ينعد
ولاَّ مسموحلك الحروف بالكدْ
ولاَّ خايف فى وشك البيبان تتصدْ
أنت الشراع للغريق
أنت الضوء فى الطريق
لو سكت القلم يبقى الظلام استبدْ
طير يا قلم وافرد جناحك
لو ليك جناح انكسر
حبرك ينبِّت
ميت جناح وألف يدْ
إوعى تخرس بخوفك
فيك كلمة جوا جوفك
تخليك شجاع
تخليك أسدْ
لهيبته استردْ
صرخة منك
تخلى العزيمة والهمة تتشدْ
دا احنا الوهن فينا راسخ
ومن كتر الكلام الماسخ
قرَّبنا ننسى الكلام الجدْ
اكتب يا قلم
يمكن تمسح للغلابة دموع ع الخدْ.
الجمعة أبريل 03, 2015 3:10 pm من طرف nemoCat
اليومية
